Minister rual ten nasa taka min bei chunga ka hlawhtling hlauh hi ka lawm. Mizoram-a BJP sum in ve lo party awmchhun kan ni. Dr. Mala
Vawiin May ni 8, 2026 Zirtawpni khan Mizoram Pradesh Congress Committee chuan Friday Political Session-ah Dr Lalmalsawma Nghaka, MPCC Treasurer Aizawl Municipal Corporation inthlana a tling lawmpuina hun hmang.
Lawmpuina hi Pu Lal Thanzara, MPCC President chuan a hlan a, Mahila leh Congress thali te pawhin lawmpuina an hlawn bawk.
Corporator thlan thar Dr Lalmalsawma Nghaka chuan thu sawiin, “Kan hotuten kei tehlul AMC inthlana ka tling min lawmpui hi ka lawm em em a ni. AMC inthlanah khan kan party kan che tha tawk lova, keinin sang tak thlen tum mah ila, Pathianin hun a la ti lo aniang ka ti a, ka va din vena ah pawh Minister rual in house to house nen nasa takin an bei a, chuti chung chuan kan hlawhtling thei a, a lawmawm hle a ni, a ti
Dr. Mala chuan, “Centralah Congress an sawrkar hma loh chuan Mizoramah chuan an sawrkar loving an ti thin a, mi tamtakin an awih a, a pawi ka ti hle. Centralah BJP sawrkar laiin Chatisgarh ah te pawh Congress a sawrkar thei a, Karnataka ah pawh a sawrkar thei a, Himachal ah pawh a sawrkar thei a, tunah Kerala ah pawh sawrkar thar Congress in kan siam mek a ni, a ti.
Centrala Congress sawrkar lai khan sum leh paiah min duhsak bik hran lo, dik tak leh tha taka sum kan hotuten an hman thin vangin hun kaltawhah khan nasa takin hmasawnna kan hmu a ni, a ti
Dr. Mala chuan, . Narendra Modi hi kum 2014 atangin a sawrkar tan a, khatih laia Congress sawrkar khan central atanga kan sum hmuh chhun chhun kha kan hotuten dik tak leh tha taka an hman avangin Mizoram sum leh pai dinhmun kha a tha em em zawk a ni, a ti bawk.
“Congress hi National party kan ni a, kan beih ber chu BJP leh an hmanrua te hi an ni. Kan ramah chuan tute nge BJP hmanrua kan hre theuh ang, alliance kaltlang te, kalttlang lo deuh te in kan ramah hmanrua an nei a ni a. BJP hian kan rin loh laiin, zawite te in hma an la a, kan inrin hma in nasa takin hma an rawn la in min hneh thei ani tih kan hriat a ngai a ni, a ti.
Dr. Mala chuan, Congress party hi Mizoramah hian BJP sum it ve lo, BJP malsawmna mamawh ve lo party awmchhun kan ni a, BJP dolet thei ber kan ni, a ti bawk.
