MPCC General Secretary Lalrinliana chuan MNF leh ZPM sorkar hian kuthnathawktute hmangaih anga insawi siin, lei rem an rahna tur ruahmanna tak tak an nei lo, a ti.
He thu hi vawiin-a Congress Bhavan political session-ah sawiin, Lalrinliana chuan MNF hun lai khan MIP an kalpui ṭha duh lo a, a hnuah SEDP kalpuiin kuthnathawktute tan Rs. 3,00,000 an tiam a, NLUP dawng tawh zawng zawng pawhin an dawn vek dawn thu nen ram pumah an campaign a. An sorkar hnuah cheng nuai thum sem lovin an mi duhsak zawngte hnenah Rs. 25000 an sem a, mi tlemte-in Rs. 25000 dang an dawn belh leh a. Kum 2018-2023 kha MNF in kuthnathawktute a bum vawi hnihna a ni a. An flagship policy an kalpui dan enin kuthnathawktute an hmangaih loh zia a langchiang hle a ni, a ti.
MNF te an chet chiat em avangin kum 2023 inthlan hma khan ZPM chuan kuthnathawktute hnenah an tih hlawhtlin theih loh tur pui pui an tiam avangin an sorkar phah a. Kutthnathawktuten beiseina nen ZPM sorkar hi an thlir laiin vawiin thlengin ruahmanna mumal an la nei lo a. Mipuiin ZPM an hriatthiam dan chu ka ti ang an tih zawng zawng an ti lo va, ka ti lo vang an tih zawng zawng an ti tih hi a ni a.
An flagship programme BANAKAIH pawh Central atanga ruahmanna rawn kal mek CSS te a ni tlangpui a, a tam zawk chu loan component nena hmalakna tur a ni a. Chief Minister Special Package an tih pawh hi CSS ruahmanna hming dang an vuah mai a ni. Kuthnathawktute hnenah thlai thar 4 lei an tiam a, Sawhthing pawh price support pek an tiam laiin vawiin thlengin sorkar hian cheng nuai tam tak ala bat sak a, hmunphiah hi thar beisei zat zahve (50%) pawh an lei phak lo va, hmarcha leh aieng chingtute pawhin anmahni remhriat danin an hralh a ni, a ti bawk.
Lalrinliana chuan, Congress sorkar chuan ka ti ang a tih chu a ti hlawhtling thin a. Lal Thanhawla kaihhruai sorkar kha Mizoram kuthnathawktuten an chhawr tangkai zia hi sawi nawn fo a tul a. NLUP kha district tina Dy. Commissioner kaihhruaina hnuaiah hmalak a ni a, beneficiaries 1,43,000 chuangin NLUP hamthatna kha an dawng a ni. Zo khuaa kuthnathawktute, ran vulha eizawngte leh thiam thil hmanga eizawng tam tak ten lei rem an rah phah a, NLUP hlawhtlinna atang khan Congress chauhin kuthnathawktute a hmangaih zia a langchiang a. Chuvangin, leirem rah tuma rilru seng zawng zawngte chuan Congress hi a tha ber a ni tih hi kan hriat tlan vek a hun tawh hle a ni, a ti bawk.
