Rajya Sabha Member tur thlanna neih mek a ni
Vawiin June 18, 2026 (Ningani) hian ZPM MLA 27 leh MNF MLA 10 ten Rajya Sabha Member thlanna an nei mek a. Mizoram Pradesh Congress Committee leh Mizoram State BJP MLA ten vote an thlak ve dawn lo tih an puang tawh a. Rajya Sabha inthlanah hian MLA-te'n vote an thlak dawn a, rorel lai ZPM-in MLA 27, MNF-in MLA 10, BJP-in MLA 2 leh Congress party-in MLA 1 an nei a. MP a tling tur hian vote 21 hmuh tlin a ngai dawn a, vote tlate hi tlai dar 5-ah chhiar nghal a ni dawn a ni.
India Dan Pui hnuaiah Article 80-na angin Rajya Sabha-a state tin aiawhtu turte chu an Legislative Assembly member thlante’n an thlang thin a. Rajya Sabha inthlanah hian MLA-te chu an party candidate-te vote tura beisei an ni ngei a, chuti rualin an duh phawt chuan party dang candidate kha an vote thei a ni, a ti bawk a. MLA-te chuan an duh duh an vote thei ang a, amaherawhchu an party authorized agent-te kha an vote thlakna an hmuhtir phal tur a ni chauh zawk a. An hmuhtir phal lo a nih emaw, mi dang an hmuhtir emaw chuan an vote kha a thih theih thu a sawi a ni.
Rajya Sabha MP atan hian ZPM Party chuan K. Laltluangkima candidate in, MNF Party chuan Zothansangi Hmar an candidate a ni a. Vote nei MLA 40 zingah MLA 36 in vote an thlak a. BJP MLA Dr. K Beichhua leh K. Hrahmo bakah Congress MLA C. Ngunlianchunga ten vote an thlak loh bakah hian, ZPM MLA Tuichang Bialtu W. Chhuanawma'n a hriselna dinhmun avangin vote hi a thlak thei lo a ni.
