ZPM Party in Rajya Sabha MP atana K. Laltluangkima thlan tlin a ni chu lawmawm an ti
Vawiin-a ZPM Party thuchhuah chuan, Mizoram aiawh Rajya Sabha Member of Parliament thlanna tluang taka neih a ni hi lawmawm kan ti. Mizoram Legislative Assembly Member 40 awmna-ah Member 36-in vote an thlâk a, vote thlak lo pali awmin, ZPM party Rajya Sabha MP candidate K. Laltluangkima'n vote 26 hmuin hneh taka thlan tlin a ni, an ti.
Rajya Sabha inthlana ZPM party MLA vote thlak thei ten ZPM 'official candidate' an vote vek thei hi party inlungrualna leh thawhhona ṭhatzia lantirtu a ni a. Hetihlai hian damlohna avanga Election Commission-a 'home voting' dil sak W. Chhuanawma erawh phalsak a ni ta lo thung a ni, an ti a. 'Politics'-a dik lo taka inbeihna atana thu diklo hmang hreh lotu eptu party pakhatin; ZPM party MLA te vote a pelhê tur thu mipui bum tuma an lo aupui chiam erawh a dik lohzia a lang leh ta, Ramhlui ziaa inbum tumna hi sim tawh se kan ti a. Mahni mawhphurhna hlena vote thlaktu MLA zawng zawngte an fakawm hle a ni, an ti bawk.
ZPM thuchhuah chuan, hetih mêk lai hian BJP MLA pahnih leh Congress MLA pakhatin vote an thlak duh lo hi mipui zah lohna leh India dan zah lohna lantirna dik tak a ni, an ti a. Mipui hnêna vote zawng ṭhin, vote thlak uar tura fuih tur te, khua leh tui ṭha ni tura vote thlak pawimawhna te auchhuahpuitu tur berin vote an thlak duh lo hi 'khua leh tui ṭha' mawhphurhna hlen duh lo mizia dik tak a ni a. Mizoram BJP leh MPCC-te hi vote thlak lo tura inthurual tak an lo ni bawk, an ti.
Mizoram aiawh tur Rajya Sabha Member of Parliament thlanna neih tur atana inbuatsaihna a tawp thlenga buaipuitu; thawktu, mawhphurtuten an hna thianghlim leh felfai taka an hlen avangin an chungah lawmthu ZPM chuan an sawi bawk a. Kum 2026 aṭanga 2032 thlenga Mizoram aiawha Rajya Sabha Member of Parliament ni tur K. Laltluangkima hian ram leh hnam tana theih tawp chhuah turin duhsakna kan hlan a ni, an ti bawk.
