Rama leh muanna atan Congress party hi hmanrua kan ni. ZPM kan ENCHHIN hi a pawi. Mizo App hi Taxi hmangtu ten chhiah pek na tura siam a ni. Dr. Lallianchhunga
Vawiin June 19, 2026 (Zirtawpni) hian MPCC chuan Congress Bhavan Golden Hall-ah Political Session an nei a. Dr. Lallianchhunga, MPCC Gen.Secy leh Spokesperson ni bawk chuan thu sawiin, “Mizoram ralmuan chhan chu Pathianin Mizoram-ah remna leh muanna thlentu ni turin Congress party min thlan vang a ni a, kum 20 chhung rambuai a tawp theih nan Lal Thanhawla leh a thawhpui Minister ten lalṭhutthleng an kian a ni” a ti.
Dr. Lallianchhunga chuan, “Remna leh muanna kan neih theih nan June 25, 1986 ah Congress Vice President Arjun Singh leh Laldenga ten Mizoram a sorkar lailawk (Interim Government) din dan tur Inremna an siam hmasa a, Laldenga chu Mizoram Chief Minister a nihna tur leh Lal Thanhawla chu Dy.Chief Minister a nihna turin hming an ziak a ni. Congress party leh MNF te’n inremna an ziah lai hian ‘engtik niah nge sorkar laipui leh MNF te an inrem ang?’ tih tumahin an la hre lo va. An inrem huna harsatna a awm loh nan Lal Thanhawla’n CM lalṭhutthleng a kenna tur an lo tifel hmasa vek hi a ropui em a, Pathian pawhin mal a sawm a, Pu Hawla chu Mizorama CM awm tawh zingah CM ni rei ber Record chelh phain Pathianin a chawisang a, a kaihhruai Congress party pawh Mizorama rorel tawh party zingah ram tana rotling hnutchhiah tha ber kan nih theih phah a ni” a ti.
Mizoram leiba chungchang sawiin, MPCC Spokesperson chuan, “Kum 2023 inthlan hma kha chuan ZPM hi sorkar sum leh pai enkawl thiam tur, a tlaran zawnga khawsa duh lo turin mipuiin an ngai a. Mahse, an sorkar hnua an khawsak dan erawh leiba tipung nasa tur zawngin, a tlaran zawngin an khawsa a. State kan nih hnuah kan Budget aiin kan leiba a tam phah ta hial a; Kumin 2026-2027 Mizoram Budget chu cheng vbch 17,076.92 a nih laiin, kan leiba chu cheng vbch 19,085.15 a ni dawn a ni. Mizoram chu leiba thangah (debt trap) min tantir a ni ringawt a. Sorkar leh tur tan pawh buaipui tham leiba ZPM sorkar hian a hnutchhiah hman dawn a, ZPM kan ENCHHIN hi a pawi hle a ni” a ti bawk.
Dr. Lallianchhunga chuan, “Mizo App hman tur tia Taxi ho an tukluih pawh hi engdang ni loin, mipuite atanga chhiah (tax) an khawnna hmanrua tur a ni a. India ram khawpui lian UBER leh OLA hmannaah Taxi neitute’n Registration Fee cheng khatmah an chawi loh laiin, Mizoramah chuan Registration Fee Rs.500 an chawi dawn a. Taxi hmangtute’n chhiah an pekna tur atana Mizo App hi siam a ni ber. Mipuite hi rawk dan chikima min rawk an tum ni berin a lang” a ti bawk.
