Kei aia fel leh ṭha kan party-ah an tam teh lul nen kei ber kher min thlang hi vannei ka inti tak zet. K. Laltluangkima
Vawiin June 19, 2026 (Zirtawpni) khan ZPM General Headquarters chuan Member of Parliement, Rajya Sabha atana K. Laltluangkima thlan thar a nih lawmpuina leh Pathian hnena lawmthu sawina hun an hmang.
Inkhawm hi ZPM Vice President VL Zaithanzama MLA in a kaihruai a, Rajya Sabha MP thar K. Laltluangkima chuan thu sawiin, "Pathian rorel danah a hmasaberin lawmthu ka sawi a, kan party hruaitu leh member zawng zawngte duhsakna avangin ka lawmna a sang hle a ni. Kei aia fel leh ṭha kan party-ah an tam teh lul nen kei ber kher min thlang hi vannei ka inti tak zet a, in support-na leh ṭawngṭaipuina te, in thurawn te ka mamawh hle dawn a ni, a ti.
Laltluangkima chuan, tun ṭum Rajya Sabha MP inthlan chu a hahthlak hle mai a, nasa taka chhaih buai kan ni a, Rajya Sabha MP thlan hmasak khan ZPM pawh opposition kan ni a, khatih laia rorel lai candidate kha chhaih buai lovin tluang takin inthlanna neih a nih kha. Amaherawhchu kan thil tum hi a khirh poh leh a hlawhtlinna hi a thlum ve thung a. Ka awm zel dan tur hi tun dinhmunah chuan la hriat theih a ni lova, K. Vanlalvena MP ni mek term hi July 18-ah a tawp dawn a, Pu Vena term a tawp chuan Monsoon session-in a chhunzawm ang a, chumi hunah chuan Mizoram aiawh turin Delhi lamah kan chhuk ve tawhin ka ring", a ti bawk.
