Corruption hian Cancer angin kan ram hi thuk takin min ei chhe mek. Lalnunmawia Chuaungo
Vawiin ni 18.6.2026 (Ningani) hian Pu Lalnunmawia Chuaungo, Senior Vice President MPCC chuan Khawzawl District tlawhin Party mi te nen inkawmhona neih a ni a, Khawzawla chanchinthar lakhawmtute nen inkawmna an nei bawk.
Pu Lalnunmawia Chuaungo, Senior Vice President MPCC chuan Khawzawlah thuthar lakhawmtute kawmin, Mizoram hi North East State te zinga corruption tlem berna pawl ti a hriat ni thin, kum 10 hma lama kan hriat lar loh Open Tender lem, Restricted Tender lem, Departmental Work lem leh Work Supervisor lem te chu nitin deuhthaw hmuh tur leh hriattur a awm ta hi a lungchhiat thlak takzet a, Corruption hian Cancer angin kan ram hi thuk takin min ei chhe mek. State sorkara thuneihtu sang ber hi corruption awm loh nana a vengtu ni lova a hnukpuia a tan zawk tlat hi chuan ramin chhiat lam kawng chak takin kan zawh tihna a ni, a ti.
India rama State pakhat kan nih vena zar kan zo nasa a, a zar zo nasa ber State te zingah kan awm a ni. India ram a thang a, hmasawnna a thang a, kan sum hnar pawh nasa takin a thang chho a, hmasawna hna thawhna tur pawh sum thahnem tak kum tin kan dawng. Kum 2026-27 atana kan budget estimates chu Rs 17,496.91 crores a ni a. Chu chu kum sawm kalta kum 2016-17 a kan budget estimates Rs 8038.39 crores aiin Rs 9458 crores chuangin a sang zawk a. Kum sawm chhungin kan State budget a let aia tamin a pung. State Sorkar kuta sum awm hi dik leh fel taka hman ni se chu tun aia nasa takin hmasawnna hmel kan hmu ang, a ti.
Mizoram sorkar kuta sum lut pung nasa si khawpui leh thingtlang hmun tinah mipui mangangin pawisa van thu an sawi sup sup reng mai hi a zia lo hle. Mizoram Budget hi chhungkaw tinin in sem ila cheng nuai 6 theuha insem theih khawp a ni a, Sorkar sum hlawm lian pui pui corruption avangin mi tlemte kutah a luh tawk tawk avangin mipui nawlpui chanvo nasa takin a kiam a. Mi hausa tlemte kuta an hman sen loh sorkar sum lut ta vak vak chuan kan State chhungah kawng a bo nasa a, mipui nawlpui kuta lut a tlem avangin pawisa leng-vak a tlema pawisa a vang ta a. Hei hian kan ram ei leh bar zawn kawngah nghawng tha lo tak a nei mek a ni, a ti.
Sorkarna fawng chelhtu Chief Minister leh Ministerte hi mipui aiawha kan sum vawngtu leh enkawltute mai an ni. An kuta kan dah mipui sum hi an ta a ni lova, danin a phut anga dik leh fel taka mipuite aiawha ram leh mipuite thatna tur leh hmasawn nan an hmang tur a ni. An mimal hlawkna tur leh an duhsak zawngte hlawkna tur uma an hman a thiang lova, chutiang ti tura mipui ten thuneihna kan pe lo, a ti.
Kan ram mamawh hmasa ber chu Mipui tana Rorelna Dik leh Tha pek a ni, tuna kan ram dinhmun enin Rorelna Dik leh Tha tundin hi a hnuk pawimawh hmasa ni. Mi hausa leh mi rethei te ang khat veka danin a hrut ruala, ram rorelna hnuaia mitin ten kan chanvo dik tak kan chan tlan na tur rorelna dik leh tha din hi Congress Party chuan a tum a ni, a ti bawk.
